Media Centre

An líon is airde paisinéirí riamh ag Aerfort Bhaile Átha Cliath i rith na chéad sé mhí den bhliain 2006

2 Milliún Paisinéir i mí an Mheitheamh

Tháinig beagnach 10 milliún paisinéir trí Aerfort Bhaile Átha Cliath i rith na chéad sé mhí den bhliain, ardú 15% i gcomparáid leis an tréimhse céanna anuraidh, de réir na bhfigiúirí a d’eisigh Údarás Aerfort Bhaile Átha Cliath.
Is ionann an t-ardú seo agus 1.3 milliún paisinéir sa bhreis a thaistil tríd an aerfort i rith na sé mhí sin.  
Bhí suntas ar leith le mi Meitheamh in Aerfort Bhaile Átha Cliath nuair a rinneadh freastal ar os cionn dhá mhilliún paisinéir in aon mhí amháin.   Táthar ag tuar go leanfaidh mar sin i rith na míonna Iúil, Lúnasa agus Meán Fómhair. 
Ba sa trácht idir Éire agus an Eoraip a tháinig an borradh ba mhó le linn na tréimhse, ardú 25% go dtí níos mó ná 4.4 milliún paisinéir.   Bhain cuid den dlús a bhí leis an ardú sin le os cionn 30 bealach nua nó seirbhís nua go dtí mór-roinn na hEorpa a sheoladh ó thús na bliana.
Tháinig borradh 7% faoin margadh Tras-Atlantaigh i rith na chéad sé mhí den bhliain nuair a thaistil os cionn 586,000 paisinéir anonn go Meiriceá Thuaidh nó anall.
Tháinig ardú 6% go dtí os cionn 4.2 milliún paisinéir ar líon na bpaisinéirí anonn nó anall idir Éire agus an Ríocht Aontaithe agus cruthaíodh go maith leis an trácht intíre chomh maith mar ar thaistil os cionn 380,000 paisinéir, ardú 23% i gcomparáid leis an tréimhse céanna anuraidh.
Seoladh 38 bealach taistil nó seirbhís nua ó thús na bliana ar an iomlán.
Ag tagairt dó do na figiúirí tráchta is deireanaí, dúirt Robert Hilliard, Stiúrthóir Aerfort Bhaile Átha Cliath “Tá oiread an fhoráis bhreise ar fad a tháinig ar thrácht paisinéirí i rith na bliana 2005 sáraithe ag Aerfort Bhaile Átha Cliath le linn na chéad sé mhí den bhliain seo agus thuigfí ón trácht atá á thuar go mbeidh líon na bpaisinéirí faoi dheireadh na bliana os cionn 21 milliún.
Is é dúshlán dáiríre an Aerfoirt é freastal ar an mborradh suntasach seo faoi thrácht paisinéirí gan aon acmhainní breise críochfoirt.   Ina fhianaise sin rinneadh roinnt bearta gearrthéarmacha i bhfoirgneamh an chríochfoirt agus in áiteanna eile, ar nós seirbhísí neamhriachtanacha ar an Urlár Imeachta a bhaint amach d’fhonn feabhas a chur ar thimthriall na bpaisinéirí trí fhoirgneamh an chríochfoirt agus 8 ngeata bordála nua  sealadach a chur isteach” arsa an tUas.  Hilliard.
“Tá an bhéim anois ar chur leis an uasacmhainn meántéarmach le Limistéar Seiceála Isteach 14, ar ceann nua é a mbeidh 24 deasc seiceála isteach sa bhreis ann agus é le bheith críochnaithe i mí na Nollag, agus Piara D, ar a mbeidh 14 geata bordála agus atá le bheith críochnaithe i mí Deireadh Fómhair 2007.   Ní féidir freastal ar na riachtanais acmhainne fadtéarmacha ach amháin tríd an dara críochfort a chur ar fáil agus cuirfear iarratas ar chead pleanála do C2 faoi bhráid an údaráis phleanála áitiúil roimh dheireadh an tsamhraidh,” a dúirt an tUas.  Hilliard mar fhocal scoir

Críoch
12ú Iúil, 2006

Tuilleadh eolais ag: Siobhán Moore - 01.814 4108 / 087.2710065